عدت الى الله قصة واقعية

اخوتي في الله دي يوميات او ممكن نقول مسلسل يومي لطالب جامعي ولكنه مسلسل خاص بنا مختلف عن باقي اليوميات والمسلسلات فهو مكلل بآيات القرآن الكريم ومزين بأحاديث رسولنا الحبيب صلى الله عليه وسلم ومحلى بأيات شعر وكلام للسلف

القصة ليست خيالية بل هى واقعية جدا قد تجد او تجدى تشابها كبيرا بينها وبينك فى كثير من أجزائها
(الحلقه الاولى)
على بوابة الالتزام

فى احدى شوارع القاهرة تقف عمارة شامخة آيلة الى السقوط كما هو الحال مع كثير من عمارات مصرنا المحروسة

وفى احدى طوابق هذه العمارة تقطن أسرة مصرية بسيطه تتكون من خمسة افراد

اب : موظف عادى فى احدى الشركات

ام : ربة منزل

اخت : عائشة

واخ: بطلنا الهمام ( عبد الرحمن)

واخت صغرى: فاطمة

الساعة الثامنة صباحا

ام عبد الرحمن: قوم ياابنى تعبتنى معاك اول يوم فى الكلية ومش هتروح

عبد الرحمن: حاضر ياماما قايم اهه ربع ساعه بس

ام عبد الرحمن: خلاص براحتك انا زهقت منك تروح ماتروحش انت حر

بعد نصف ساعة

عبد الرحمن: صباح الخير ياست الكل

ام عبد الرحمن : اهو هو ده الى واخدينه منك روح الكلية بقى مش من اولها كده

عبد الرحمن: حاضر اعتبرينى روحت خلاص

بعد ساعة من اللكاعه نزل من البيت

أنتظر الاتوبيس طويلا وفى النهاية أتى الاتوبيس لكن بعد ان قضى وقتا ممتعا من الافأفة( اف اف)

ركب الاتوبيس وما أكثر الزحام وبعد مدة انتهت معركة الاتوبيس بالفوز المبين ووصل للكلية

حينما رأى سور الجامعة عادت به الذاكرة الى الوارء شهورا ياااااااااااااااااااااه خلصنا خلاص من الثانوية العامة وتعبها اخيرا دخلنا الكلية
خطى اولى خطواته داخل الجامعة وعلى البوابة....

الحارس: اين الكارنيه؟

عبد الرحمن: انا لسه سنة اولى

الحارس: طيب وياريت تبقى تعمله ماتنمش عليه

دخل عبد الرحمن وهو يقول هو ماله الحارس فى حد مزعله؟

ظل يبحث طويلا عن جدول المحاضرات ليدونه فوجده اخيرا ودونه

هو لايعرف اى احد فى الكلية فالشلة الكريمه بتاعته غالبهم لم ينجحوا والجزء الاخر التحقوا بمعاهد خاصة

وصل الى المدرج وجلس

الساعة الان11:30 صباحا

بدأ الدكتور فى الترحيب بهم وخلاف ذلك مما يتحدث فيه الدكاتره اول يوم

واذن الظهر

لم يهتز لاخينا عبد الرحمن طرف(فهو بعد لم يلتزم)

حدثه احد الاخوة بجواره يبدو عليه الالتزام

ألن تصلى يا اخى؟

طيب والمحاضرة؟

هنستأذن ونرجع على طول

امممممممم اصلى مش متوضئ

تعال ننزل ونتوضئ من مسجد الكلية

معلش اتفضل انت عشان ماضيعش المحاضرة

براحتك بس عايز اقلك حاجه النجاح يبدأ من المسجد ربنا يهديك

هو فيه ايه؟ ليه كل ده؟ ماعلينا

انتهت المحاضرة وعاد عبد الرحمن للبيت الام : اهلا ياعبد الرحمن اخبار الكلية ايه؟

عبد الرحمن : كويسه

الام: مالك فى حاجه ؟

عبد الرحمن : لا عادى هاتيلى اكل

اتغدى صاحبنا ودخل لينام تقلب على السرير بعض الوقت لانه يشعر انه مخنوق ولايعرف لماذا هذا الشعور ألح على نفسه بالنوم لعله يستيقظ وقد ذهب عنه الذى يجده فى صدره

استيقظ بعد ساعات ولم يذهب مابه

قوم احسن اتفرج على التلفزيون

قضى الليل كله امام التلفاز وقبل الفجر بساعة

نام............... ولتشتكى يافجر من عبد الرحمن

نلقاكم فى الحلقة القادمه ان شاء الله

[img]http://academic-sico.yoo7.com/users/12/60/34/smiles/224804.gif

[/img]

» قصة حب واقعية
» الا رسول الله
» برنامج لاتنسى ذكر الله